El Llibru

Adautación dixital pa dispositivos Android tipu tablet de la publicación “El llibru de lo más piquiñino de casa” que’l Conceyu de Xixón ufiertaba nel hospital de Cabueñes a les families que teníen un fíu o una fía col envís de recoyer les alcordances, semeyes y progresiones de los ñacaros, dende la nacencia hasta’l tercer cumpleaños: comíes, escuela, primeres veces, familia, cómo van medrando, pallabres prestoses, nomes de neña y de neñu, firmes de la xente que los quier…

Trátase d’una campaña entamada dende distintos conceyos de la Rede de Normalización Llingüística p’animar a les families a tresmitir a la reciella la llingua asturiana nun periodu tan importante como ye’l de los primeros años, que van repercutir nel so futuru, promoviendo dende l’alministración municipal la normalización llingüística nos distintos ámbitos de la sociedá y potenciando asina la presencia del asturianu nes nueves teunoloxíes de la información y la comunicación.